लोकमनी जी, मलेसियाबाट तपाईँ फर्किदा कसरी फर्किनुभएको छ त्यसमा भर पर्छ । तपाईँ फर्किंदा करार अवधि सक्काएर ‘चेक आउट मेमे’ लिएर फर्किएको हो भने फेरि अर्को प्रक्रिया गरेर जान मिल्छ । कहिलेकाही भने फर्किंनेबेला निश्चित समयसम्म फेरि फर्किन नमिल्ने भनेर तोकिएको हुन्छ । तर त्यसका लागि त्यहाँ नियम उल्ङघन गरेको वा कुनै कारबाहीमा परेको अवस्थामा मात्रै त्यस्तो हुन्छ । नत्र सामान्य अवस्थामा तपाईँ नेपाल फर्किएर जहिले जान चाहे पनि मिल्छ ।

कर्णबहादुर जी, सबैभन्दा पहिला तपाईँले म्यानपावर कम्पनीसँग आफूले काम नपाउनुको कारण बुझ्नुहोस्। म्यानपावरले भनेको कुरा तपाईँलाई चित्त बुझेन भने साउदी अरेवियामा रहेको नेपाली दूतावासमा आफ्नो समस्या राख्नुहोस्।  ०५०००५६५२९ नम्बरमा साउदीका लागि श्रम काउन्सीलर अम्बिका अधिकारीलाई सम्पर्क गर्नुहोस्। उहाँले तपाईँको समस्या समाधानका लागि सहजिकरण गर्नुहुनेछ।

दिवस जी, हामीले तपाईँको जिज्ञासा पिपुल फोरममा आवद्ध अधिवक्ता कृष्णप्रसाद न्यौपानेसँग राखेका थियौं । तपाईँले म्यानपावर/एजेन्ट विरुद्ध वैदेशिक रोजगार विभागमा उजुरी दिएपछि कानूनी प्रक्रिया अनुसार रकम फिर्ता पाउनुभएको हो या म्यानपावरले माल्टा पठाउन नसकेपछि पैसा स्वत फिर्ता गरेको हो भनेर खुलाउनुभएको छैन । उहाँका अनुसार, यदी तपाईँलाई म्यानपावर आफैंले कुनै कानूनी प्रक्रियाबिनै पैसा फिर्ता दिएको हो भने कटाएर पैसा फिर्ता दिन पाइदैन । पैसा लिएर भनेको ठाउँमा पठाउन नसकेमा म्यानपावरले लिएको रकममा २० प्रतिशत थप गरेर फिर्ता गर्नुपर्ने कानूनी प्रावधान छ । ३२ हजार रुपैयाँ कटाएर रकम फिर्ता दिनु भनेको तपाईँ ठगीमा पर्नु हो । त्यसैले म्यानपावर विरुद्ध वैदेशिक रोजगार विभागमा गएर उजुरी गर्न अधिवक्ता न्यौपानेको सुझाव छ ।

 हिमा जी, नयाँ पासपोर्ट लिँदा नयाँ नम्बर आए पनि यसले यात्रा गर्दा कुनै समस्या पर्दैन । तपाईँको पूरानो पासपोर्टकै आधारमा एएआरपी पासपोर्ट बन्ने हो । एमआरपी पासपोर्ट बन्दा नयाँ सिरियल नम्बरको आधारमा तपाईँको पासपोर्ट नम्बर पनि तय हुन्छ । तपाईँले नयाँ नम्बर पाएपछि पुरानो नम्बरको कुनै अर्थ पनि हुँदैन । त्यसैले तपाईँ पहिले साउदी जाँदा हस्तलिखित पासपोर्टमा भएको नम्बर र अहिले एमआरपीमा भएको फरक नम्बरले कुनै समस्या पर्दैन ।

सुरेन्द्र जी, भिसाको अवधि बाँकी हुन दुई दिनअघि यूएई पुग्दा पनि कुनै समस्या हुँदैन । किनभने पहिलोपटक यएई जाँदै हुनुहुन्छ भने तपाईँसँग भएको त्यो पेपर भिसा हो । त्यसमा अवधि भन्ने हुँदैन । त्यसमा दुई महिना लेखेको हुन्छ । त्यसको अर्थ तपाईँ दुई महिना भित्र यूएई प्रवेश गरिसक्नुपर्छ । अनि गन्तव्य देशमा पुगेपछि चाहिँ पासपोर्टमा भिसा लाग्न सुरु हुन्छ । पेपरमा एक दिन मात्र भिसा बाँकी छ भने पनि सहज रुपमा प्रवेश गर्न पाइन्छ । 

अर्जुन जी, हामीले तपाईंको प्रश्न पिपुल्स फोरममा आवद्ध अधिवक्त कृष्णप्रसाद न्यौपानेसँग राखेका थियौं। उहाँका अनुसार, कम्पनी बन्द हुँदा यही सहायता पाइन्छ भन्ने कानुनी प्रवधान छैन। तर करार अवधिभर काम गर्न नपाउँदा कामदार मर्कामा पर्ने भएकाले करार अवधिभरीको तलब दावी गर्न पाइन्छ। र, क्षतिपूर्ति पनि पाइन्छ। पिपुल्स फोरमले तपाईंलाई निःशुल्क कानुनी सहायता दिन्छ। सहायता र  थप जानकारीका लागि ९८४१४२२४७१मा सम्पर्क गर्न सक्नुहुन्छ।